Infurmaziun in rumantsch grischun

Èsi capità insatge nausch cun Vus en Svizra? E na savais Vus ussa betg tge far? Alura As drizzai a l'Agid a victimas.

Titelbild - Infurmaziun in rumantsch grischun

Essas Vus daventà l'unfrenda d'in malfatg en Svizra? Essas Vus per exempel

  • vegnì blessà durant in assagl da rapinament?
  • vegnì violà, sfruttà ubain malduvrà sexualmain?
  • vegnì maltractà u avais Vus survegnì fridas da Voss um, da Vossa dunna u da Voss geniturs?
  • daventà l'unfrenda d'in accident da traffic?

Lura avais Vus il dretg da survegnir sustegn da l'Agid a victimas.

Per tgi è destinà l'Agid a victimas?

L'Agid a victimas è qua per tut ils umans ch'èn vegnids blessads corporalmain, psichicamain u sexualmain tras in malfatg en Svizra.

  • independentamain da Vossa schlattaina, Vossa vegliadetgna, Vossa orientaziun sexuala u Vossa religiun
  • independentamain da tge pajais che Vus derivais ubain sche Vus abitais a pli lunga vista en Svizra

L'Agid a victimas è era qua per Vus, sche Vus n'essas betg pertutgà sez d'in malfatg, mabain vulais gidar ina persuna che stat a cor a Vus.

Tge fa l'Agid a victimas?

L'emprim taidlan ils collavuraturs da l'Agid a victimas simplamain tiers a Vus. Per che Vus possias raquintar tge che Vus avais fatg tras. Lura decleran els a Vus tge che Vus pudais far e tge dretgs che Vus avais.

Els porschan a Vus agid concret:

  • els gidan Vus da chattar in'advocata u in advocat,
  • els pon inditgar a Vus in lieu, nua che Vus chattais protecziun,
  • els pon intermediar a Vus sustegn psicologic ubain agid medicinal,
  • ubain sustegnair Vus finanzialmain en cas urgents.

Ils collavuraturs da l'Agid a victimas èn persunas spezialisadas. Els gidan Vus da puspè vesair a moda pli clera e da decider co ch'i va vinavant.

Co cuntanschais Vus l'Agid a victimas?

Posts da cussegliaziun per l'Agid a victimas datti en l'entira Svizra. Telefonai a nus u scrivai in e-mail. Vus pudais era fixar in termin per in discurs en il post da cussegliaziun.

Qua chattais Vus tut ils posts da cussegliaziun da l'Agid a victimas en Svizra

Sch'igl è necessari collavura l'Agid a victimas cun translaturas e translaturs – er en lingua da segns.

N'essas Vus betg segir dad esser en il dretg lieu tar l'Agid a victimas? As annunziai tuttina. L'Agid a victimas infurmescha Vus en scadin cas tgi che po sa gidar cun Vus.

A moda gratuita, confidenziala ed anonima

La cussegliaziun da l'Agid a victimas è gratuita. Ella è confidenziala e sin giavisch er anonima. Nagin n'intervegn insatge da Vossa istorgia, sche Vus na vulais betg quai. Era betg la polizia.

As annunziai.
L'Agid a victimas è qua per Vus

EN CAS D'URGENZA